صوتی فایلی اندیرین (دانلود)

دانلود:

http://hosaedi.arzublog.com/uploads/hosaedi/4_ezzati-kasib.mp3

میوه‌یه حسرت‌دی نئچیل كار كاسیب

گئت خبر ائیله كاسیبی پاس باسیپ

باخسون اگر آغزینا یوخدور دیشی

جامئعه‌ده یوخ كاسیبین ارزیشی

یوخدو دامارلاردا قانی كار كاسیب

ایشلمه‌گه یوخدو جانی كار كاسیب

چوخلو شامین قئیدینی شامدان وېریپ

طایفاسی گلمیر هامی اوندان قېرېپ

دار گونونه یوخ دایاغی كار كاسیب

گولمه‌دی هئچ واخت دوداغی كار كاسیب

ائیله نظر یا رب اۏدا بنده‌دی

چوخلو زامان نفسینه شرمنده‌دی

زیندیگیوین یوخ مزه‌سی كار كاسیب

پالتاروون یوخ تزه‌سی كار كاسیب

مجلئسه گئتسه اۏنا یۏخ های وئرن

دورسادا صف‌ده اۏنا یۏخ چای وئرن

گؤرمه‌دی اؤمرونده صفا كار كاسیب

آج دولانیر  (؟)كار كاسیب

طایفادا تحریم ائلیییپلر اۏنو

آروادینین مجلیسه یۏخدور دۏنو

قیزلارینین یۏخ جاهازی كار كاسیب

یوخدو اؤونده فئر گازی كار كاسیب

دریا كیمی موج – تلاطوم‌ده دی

اؤمورو اونون ریم دادادان ریم ده دی!

داغلارین اۆستۆ لالادی كار كاسیب

هر مرضه موبتلادی كار كاسیب

باشماغی یوخدو كاسیبین بچه‌سی

چاره‌سیزین داغلارا تۆشدو سسی

اۏعلادی باخمیر سؤزونه كار كاسیب

هئی دانیشیر اؤز اؤزونه كار كاسیب

یا رب اۏنون حددن آشیپ مئحنتی

اؤعده یۏخو فرش و متككا پتی

اقصاتینی سالدی دالا كار كاسیب

گل گنه توشدو ایسالا كار كاسیب

اؤلسه اگر هئش‌كسه اۏلماز خبر

ثیروتی یوخدو اولا زیر و زئبر

بایرامینا كیشمیشی یوخ كار كاسیب

دۆز تؤرمه‌للی ایشی یوخ كار كاسیب

طایفادا یۏخ دردینه درمان ائدن

اؤلسه اگر ختمینه اولماز گئدن

(آتالارسؤزو : كاسیب اؤلوسونه یاس ساخلاماز!)

ایشلری توشدو چتینه كار كاسیب

چاتمییاجاق مقصدینه كار كاسیب

چوخ كئفی‌ساز هر جۆمه دربت‌ده‌دی

آمما كاسیب خوش گونه حسرت‌ده‌دی

باخچاسینین بئلچه‌سی یوخ كار كاســــــیب

قیزلارینین ائلچیسی یوخ كار كاســــــیب

چوخ گئجه‌لر عزتی آغلار گؤزوم

دئ ائشیدنلر بئله بیلسین سؤزون

اللری چاتمیر چاریغا كار كاســــــیب 

گــــــــل گنه توشدو تیریـــــــغا كار كاسیب!

درین‌دیر، قورخولودور ساكیت آخان لال سولار

بیر كلمه‌نین ایچینده بعضن نئچه سؤز یاتیر

عادی گؤزله گؤرونمز اوردا یاتان دویقولار

چؤزله‌سن، گؤررسن كۏل آلتیندا كؤز یاتیر.

ایچیمی گؤرستمه‌دیم جاهیل توتان گۆزگویه

اۆزده گولوپ، ایچیمده مۆشكولومه آغلادیم

میللتیمین دردینی عونوانلاییپ اؤزگه‌یه

باشقاسینین یاسیندا اؤز اؤلومه آغلادیم.

من قورخورام، سن قورخورسان،

او دا قورخور، بو دا قورخور،

بیز قورخوروق

تزه فیكیر بئینیمیزه گلن كیمی

تئز قورخوروق.

باشقاسین‌دان قورخدوغوموز بس دییلمیش،

اؤزوموزدن بیز قورخوروق!

قورخو، قورخو!

بیر قورد اولوب یئییر بیزی ایچیمیزدن،

نه گؤزلییر وطن بیزدن؟

ایراده یوخ،

كیشی‌لیك یوخ.

بیز قورخوروق،

بیز سوسوروق.

فیكیر اؤلور،

جان سوستالیر،

اورك دونوب،

روح بوغولور.

قورخو بیزیم دیلیمیزده كیلید اولور،

بئینیمیزده قیفیل اولور.

درد بودور كی، بو دردی ده

بیز قانیریق، بیز بیلیریك.

قورخا قورخا

اؤزوموز ده اؤزوموزچون

بیز قورخویا چئوریلیریك.

منیم سۏل الیمده یانیق یئری وار
او منه تؤحفه دیر كؤرپه‌لیگیمدن
اۏتون اۏتلوغوندان خبرسیز واختلار
الیمی مانقالدا یاندیرمیشام من
**
منه جیز دئدیلر
آنجاق قورخمادیم
الیمی یاندیریب تانیدیم اۏتو
منیم حیاتیله ایلك تانیشلیغیم
الیمی یاندیران اۏتدان باشلادی
**
اۏخشادی گؤزومو هله اوشاق‌كن
اوجاغین آل الوان آلاوی كؤزو
دونیایا گله‌لی، بیلمیرم ندن،
نییه وورولدوقسا یاندیریر بیزی
**
من اۏتدان قورخمادیم یانانا قدر
من قۏرخو بیلمه‌دیم قانانا قدر
ائله كی یاندیم
اۏتلا اویناماقدان قورخدوم دایاندیم
باشلاندی قورخو
باشلاندی احتیاط
باشلاندی حیات ...

ساچلاریما دن دوشور، دن دوشور، یامان دوشور

هر باخاندا آنامین، اۆرگینه قان دۆشور.

بو آغ ساچلار، آی انا، سنی درده سالماسین

ساچیمین آغلیغیندان قانین هئچ قارالماسین!

آلیشیرام گئجه‌‌لر ماسا آرخاسیندا من

ساچلاریمدا آغاریر قلبیمین آتشیندن

سن دئمه كی بالامین بلكه گیزلی قمی وار

واختسیز آغاران ساچیمین اؤزگه بیر عالمی وار

اؤلوم بئله قم دییل بو حیاتی دویانا

من بو آغ ساچلاریملا اؤعونورم، آی آنا

قارا، شوه ساچلاری طبیعت وئرمیش منه

من گۆونه‌بیلمرم اۏنون بو تؤعفه‌سینه

زحمتی حیاتیمین ایلك بزه‌گی سانمیشام